گاپوچی گم گم

شوقؔ بہرائچی کا وہ معروف شعر تو آپ نے سنا ہی ہو گا:

برباد گلستاں کرنے کو بس ایک ہی الو کافی تھا

ہر شاخ پہ الو بیٹھا ہے انجامِ گلستاں کیا ہو گا​

وطنِ عزیز کی حالتِ زار پر اس شعر کو چسپاں کرتے ہوئے بھی ہمیں عرصہ بیت گیا ہے مگر مجال ہے جو کسی الو کے کان پر جوں تک رینگی ہو۔ بلکہ حق تو یہ ہے کہ ایک ایک شاخ پہ الوؤں کی کئی کئی رہائشی سکیمیں وجود میں آ گئی ہیں جن کے لیے جوئیں کم پڑ گئی ہیں۔
تازہ ترین خبر یہ ہے کہ نیشنل ٹیسٹنگ سروس یعنی این ٹی ایس (NTS) کے سی ای او جناب ڈاکٹر ہارون رشید ستارۂِ امتیاز کی پی ایچ ڈی کی ڈگری 72 فیصد نقل پر مبنی ثابت ہوئی ہے۔ ایچ ای سی کی تحقیقات کے مطابق موصوف نے 2004ء میں ہمدرد یونیورسٹی سے پی ایچ ڈی کرنے والے ایک سکالر رفیق الرحمٰن کے مقالے پر ہاتھ صاف کیا ہے۔ ڈاکٹر صاحب پاکستان کی کامسیٹس یونیورسٹی میں بھی ایک کلیدی عہدے پر فائز ہیں۔

سرکاری سکولوں میں طلبہ کی شرحِ حاضری 80٪ مقرر

سرکاری سکولوں میں طلبہ کی مطلوبہ شرحِ حاضری 90 فیصد سے گھٹا کر 80 فیصد مقرر کر دی گئی ہے۔ جن اساتذہ کے خلاف طلبہ کی حاضری 90 فیصد سے کم ہونے کی بنیاد پر کارروائی کا فیصلہ کیا گیا تھا ان کی سزائیں حاضری 80 فیصد سے اوپر ہونے کی صورت میں معاف کر دی جائیں گی۔